古文粵譯：裴鉶〈聶隱娘〉
Sunday, July 19th, 2015見侯孝賢的《刺客聶隱娘》快公映，找了原文一讀。興之所至，效梁煥松前輩，也來古文粵譯。原文用粗體。
~~~~~~~~~~~~~~~~~
聶隱娘者，唐貞元中，魏博大將聶鋒之女也。年方十歲，有尼乞食於鋒舍，見隱娘，悅之。云：「問押衙乞取此女教。」鋒大怒，叱尼。尼曰：「任押衙鐵櫃中盛，亦須偷去矣。」及夜，果失隱娘所向。鋒大驚駭，令人搜尋，曾無影響。父母每思之，相對涕泣而已。後五年，尼送隱娘歸。告鋒曰：「教已成矣，子卻領取。」尼歘亦不見。
話說聶隱娘呢個人，係唐朝德宗貞元年間，魏博大將聶鋒個女來o既，即係八世紀末九世紀初人啦。佢十歲o個時，有個師太去聶鋒屋企乞食，見到隱娘佢，好歡喜，就同聶鋒講：「大人呀，我求你將呢個女仔過俾我，等我教佢啦。」聶鋒聽到扯晒火，鬧返個尼姑。尼姑就話：「任大人你用個鐵櫃困住你個女，我終歸都會帶得佢走。」到天黑，果然唔知隱娘去o左邊。聶鋒驚到乜咁，叫人四出去搵，乜影乜聲都冇。隱娘老竇老母一諗到個女，都只能夠你眼望我眼，喊得一句句。五年之後，個師太送隱娘返來，同聶鋒講：「我都教到佢滿師囉，你就咁得到佢手。」跟住suet一聲就唔見人喇。
一家悲喜。問其所學。曰：「初但讀經唸咒，餘無他也。」鋒不信，懇詰。隱娘曰：「真說又恐不信，如何？」鋒曰：「但真說之。」曰：「隱娘初被尼挈，不知行幾里。及明，至大石穴之嵌空，數十步寂無居人，猿狖極多，松蘿益邃。已有二女，亦各十歲，皆聰明婉麗，不食，能於峭壁上飛走，若捷猱登木，無有蹶失。尼與我藥一粒，兼令長執寶劍一口，長二尺許，鋒利吹毛，令剸逐二女攀緣，漸覺身輕如風。一年後，刺猿狖，百無一失。後刺虎豹，皆決其首而歸。三年後能飛，使刺鷹隼，無不中。劍之刃漸減五寸，飛禽遇之，不知其來也。至四年，留二女守穴，挈我於都市，不知何處也。指其人者，一一數其過，曰：『為我刺其首來，無使知覺。定其膽，若飛鳥之容易也。』受以羊角匕首，刀廣三寸。遂白日刺其人於都市，人莫能見。以首入囊，返主人舍，以藥化之為水。五年，又曰：『某大僚有罪，無故害人若干，夜可入其室，決其首來。』又攜匕首入室，度其門隙，無有障礙，伏之樑上。至瞑，持得其首而歸。尼大怒曰：『何太晚如是！』某云：『見前人戲弄一兒，可愛，便未忍下手。』尼叱曰：『已後遇此輩，先斷其所愛，然後決之。』某拜謝。尼曰：『吾為汝開腦後，藏匕首而無所傷。用即抽之。』曰：『汝術已成，可歸家。』遂送還。云『後二十年，方可一見。』」鋒聞語甚懼，後遇夜即失蹤，及明而返。鋒已不敢詰之，因茲亦不甚憐愛。
就咁成家人既悲又喜，問隱娘學到o的乜。隱娘答話：「起初都係讀經念咒，之外無其他喇。」聶鋒唔信，好聲好氣問個詳細。隱娘就話：「我講真又怕你唔信，咁點好啫。」聶鋒話：「你講真話啦。」隱娘就講喇：「起初我俾師太拎o左去，都唔知去o左幾遠。到日頭，去到個大石窿處，有個嵌入o既空位，週圍一帶都靜yingying無人住，但係好多猿洞，松上寄生都唔少。師太已經養住兩個女仔，都係十歲，又叻又靚，唔使食飯，就可以o係懸崖一帶飛奔，好似o的金尾細猴上樹咁敏捷，都無話失足o既。師太畀我一粒藥，同埋要我時時拎住把寶劍，把劍長兩尺左右，利到吹條毛去就斷，佢叫我只跟住兩個師姐爬來爬去，慢慢就覺得自己個身似風咁輕盈。過o左一年，我搵猿洞練劍，次次都中。後來搵虎豹試劍，都無話唔斬到佢o地個頭返來o既。跟師太三年之後我就識飛天，去拎劍拮鷹，都中。用下用下，劍刃慢慢薄o左五寸，o的雀鳥遇到都唔知有劍來。到第四年，師太留兩個師姐守石窿，帶我出城，我都唔知係邊處。師太指個人要我落手，逐樣逐樣數佢錯乜，然後就話：『同我殺o左佢，拎佢個頭返來，等佢死都唔知乜事。唔好嚇親佢，呢樣你做就好似對付o的雀鳥咁易啫。』我就得到把羊角柄刀仔，三寸長啦。然後我就日頭o係城內拮中o個個人，無人見得到，之後我將佢個頭割落來放入個袋，返去師太住o個處，用藥將個頭化成水。到第五年，師太同我講：『有個大官有罪，無啦啦害o左若干人，你天黑可以入佢間房，斬佢個頭落來。』我帶住把匕首去大官間房，量間房門罅點樣，無阻滯喇，就伏o係房上方條橫樑度。天一黑，我就拎大官個頭返歸。師太好嬲，問我：『點解晏成咁！』我就答：『我見眼前人同個細路仔玩，個細路仔好可愛，於是就唔忍心下手。』師太鬧我：『以後見到呢等人，先殺o左佢鍾意o個個，然後隊冧佢。』我聽完多謝師太教誨。師太然後話：『我同你開頭臚之後，頭度可以收埋把刀仔，但刀仔唔會整傷你。當你要用o個時，就o係頭到掹出來啦。』又講：『你技藝都到家，可以返屋企囉。』於是佢就送我返來。佢又話：『過o左二十年，先可以再見面。』」聶鋒聽完好鬼驚，之後每到夜晚，隱娘就唔見人，天光先返來。聶鋒都唔敢再盤問個女，亦因為咁就唔多錫佢。
忽值磨鏡少年及門，女曰：「此人可與我為夫。」白父，父不敢不從，遂嫁之。其夫但能淬鏡，餘無他能。父乃給衣食甚豐，外室而居。數年後，父卒。魏帥稍知其異，遂以金帛署為左右吏。如此又數年。至元和間，魏帥與陳許節度使劉昌裔不協，使隱娘賊其首。隱娘辭帥之許。劉能神算，已知其來。召衙將，令來日早至城北，候一丈夫、一女子，各跨白黑衛。至門，遇有鵲前噪，夫以弓彈之，不中，妻奪夫彈，一丸而斃鵲者。揖之云：「吾欲相見，故遠相祗迎也。」衙將受約束，遇之。隱娘夫妻曰：「劉僕射果神人，不然者，何以洞吾也。願見劉公。」劉勞之。隱娘夫妻拜曰：「合負僕射萬死。」劉曰：「不然，各親其主，人之常事。魏今與許何異，顧請留此，勿相疑也。」隱娘謝曰：「僕射左右無人，願舍彼而就此，服公神明也。」知魏帥之不及劉。劉問其所須，曰：「每日只要錢二百文足矣。」乃依所請。忽不見二衛所之。劉使人尋之，不知所向。後潛收布囊中，見二紙衛，一黑一白。後月餘，白劉曰：「彼未知住，必使人繼至。今宵請剪髮，繫之以紅綃，送於魏帥枕前，以表不回。」劉聽之。至四更，卻返曰：「送其信了。後夜必使精精兒來殺某，及賊僕射之首。此時亦萬計殺之。乞不憂耳。」劉豁達大度，亦無畏色。是夜明燭，半宵之後，果有二幡子，一紅一白，飄飄然如相擊於床四隅。良久，見一人自空而踣，身首異處。隱娘亦出曰：「精精兒已斃。」拽出於堂之下，以藥化為水，毛髮不存矣。隱娘曰：「後夜當使妙手空空兒繼至。空空兒之神術，人莫能窺其用，鬼莫得躡其蹤。能從空虛之入冥，善無形而滅影。隱娘之藝，故不能造其境，此即繫僕射之福耳。但以于闐玉周其頸，擁以衾，隱娘當化為蠛蠓，潛入僕射腸中聽伺，其餘無逃避處。」劉如言。至三更，瞑目未熟，果聞頸上鏗然，聲甚厲。隱娘自劉口中躍出。賀曰：「僕射無患矣。此人如俊鶻，一搏不中，即翩然遠逝，恥其不中。才未逾一更，已千里矣。」後視其玉，果有匕首劃處，痕逾數分。自此劉轉厚禮之。
無意中，有個做磨鏡o既男仔上門，隱娘就話：「呢個人可以娶我，做我丈夫。」然後隱娘同老竇講，聶鋒就唔敢唔肯，於是將個女嫁o左畀個男仔。個女婿呢，只係識得省鏡，之外乜技能都無。聶鋒於是畀足衣食對小夫妻有突，住就住o係外邊間房。幾年之後，聶鋒過身。魏博節度使都知道下隱娘個老公有o的唔尋常，於是俾錢俾絲布，請佢做身邊左右手。咁又幾年。到憲宗元和年間，魏博節度使同陳許節度使劉昌裔唔o岩，於是魏博節度使就叫聶隱娘暗殺劉昌裔，割埋個頭。隱娘離開魏博節度使，去o左陳許。劉昌裔識得算卦，重好得，已經知道佢o地會來，於是叫定衙門武官，命令佢第二日早去城北，等一男一女，男騎白驢，女騎黑驢。兩夫妻去到城門，見到有鵲o係前面嘈嘈閉，老公拉丫叉射鵲，唔中，老婆就搶過丫叉，一o野就射死隻鵲。武官見到佢o地，向兩夫妻作揖，話：「我諗住見你o地，所以行遠路來迎接你o地。」武官受劉昌裔命令，結果真係遇到兩夫婦。隱娘兩夫妻對武官話：「劉大人真係神人，如果唔係，點解會知我o地來？我o地想見劉大人。」見到兩夫婦，劉昌裔就安慰佢o地兩個。隱娘夫妻拜佢，話：「我o地兩個欠你o既，真係萬死先抵到呀。」劉昌裔答話：「唔係咁講。人通常都係近返自己主人。魏博而家同陳許有乜唔同呢，希望你o地留o係呢處，大家唔好懷疑對方。」隱娘多謝劉昌裔，話：「大人左右無能幹之人，我o地願意離開o個處而來呢處，因為我o地佩服大人叻到似神咁。」——佢o地知道，魏博節度使及唔上劉昌裔。劉昌裔問隱娘有乜需要，隱娘就答：「每日要二百文錢就夠喇。」劉昌裔就按呢句而做。但係突然唔見o左兩隻驢去o左邊。劉昌裔搵人去搵，都唔知兩隻驢去向。後來府上有人暗地收返o的布袋，入面有兩隻紙驢，一黑一白。過o左個幾月，隱娘同劉昌裔講：「舊老細唔知我o地下落，實會派人來呢度。我想今晚可以剪髮，頭髮用紅布綁住，送去舊老細床前，話俾佢聽我唔返來。」劉昌裔就聽隱娘講。到四更，隱娘返來，話：「頭髮送o左，叫通知o左喇。後晚魏博節度使實派精精兒來殺我，同埋暗殺大人你，要你個頭。到時我點都會殺o左佢，懇請你唔使擔心。」劉昌裔係個睇得好開o既人，佢聽完睇落都唔驚。o個晚劉府點燭點到光燦燦，半夜之後，果然有兩條幡來到，一紅一白，飄下飄下，o係床四角出現，好似要撞埋咁。隔o左一段時間，見到有個人由上面跌落來，頭身分開。隱娘亦都出來，話：「精精兒已經死o左。」佢將精精兒屍首拖出屋外，用藥化成水，毛髮都無埋。隱娘然後話：「後晚魏博節度使應該會又派空空兒來，佢好好身手。空空兒技法如神，無人能夠見到佢點使，無鬼可以跟得到佢。佢可以由空入深，又擅於o係無形態o個陣，搞到無影。隱娘o既技術，以前都去唔到呢個境界，而家就要睇大人好唔好彩喇。大人如果用于闐玉圍自己條頸，冚好被，隱娘會變成蠛蠓咁細，偷偷入去大人腸胃度等，到時空空兒唔使旨意有地方匿。」劉昌裔跟佢說話咁做。去到三更，劉昌裔闔o左眼，不過未瞓得稔，果然聽到頸上有撞擊聲，重好大聲添。隱娘o個陣就由劉昌裔個口跳出來，恭喜老細：「大人你無事喇。佢呢，似隻敏捷o既鶻，一打唔中，就會飛快咁走到遠一遠，因為覺得唔中好醜。佢離開你一更都冇，都走o左成千里咁遠囉。」後來睇返塊于闐玉，上面果然有匕首劃過o既痕跡，長度超過幾分。由o個時起，劉昌裔一改對隱娘o既安排，俾得好多佢。
自元和八年，劉自許入覲，隱娘不願從焉。云：「自此尋山水，訪至人，但乞一虛給與其夫。」劉如約。
去到元和八年，劉昌裔由陳許去京城見皇上，隱娘唔肯跟埋去。隱娘話：「由而家開始，我會去睇好山好水，探超凡出世o既高人，但請大人畀一處地方我先生住。」劉昌裔就咁樣做。
後漸不知所之。及劉薨於統軍，隱娘亦鞭驢而一至京師，柩前慟哭而去。開成年，昌裔子縱除陵州刺史，至蜀棧道，遇隱娘，貌若當時。甚喜相見，依前跨白衛如故。語縱曰：「郎君大災，不合適此。」出藥一粒，令縱吞之。云：「來年火急拋官歸洛，方脫此禍。吾藥力只保一年患耳。」縱亦不甚信。遺其繒彩，隱娘一無所受，但沉醉而去。後一年，縱不休官，果卒於陵州。自此無復有人見隱娘矣。
後來，慢慢就冇o左隱娘o既下落。到劉昌裔做統軍o個陣，佢過o左身，隱娘快驢加鞭，去到京城，o係劉昌裔柩前喊得好傷心，然後離開。去到文宗開成年間，隱娘都四十幾囉，劉昌裔個仔劉縱被任命陵州刺史，劉縱去到四川棧道o個陣，見到隱娘，個樣似到同以前一樣。隱娘見到劉從好開心，同以前一樣，騎住隻白驢。隱娘同劉縱講：「大人你有大難，唔適合來到呢處。」然後拎一粒藥，叫劉縱吞o左佢，跟住話：「下年你要o拿o拿聲辭官返洛陽，先可以避難。我呢粒藥，效力頂得一年咋。」劉縱唔係幾信。劉縱送彩色絲布俾隱娘，隱娘一樣都無要，只係同劉縱飲酒飲到醉之後，就走o左。一年之後，劉縱無辭官，果然o係陵州過身。之後都無人見過隱娘囉。
